बैशाख–१४, जिल्ला अस्पताल खोटाङका महिला अहेवमाथि खुकुरी प्रहार गर्ने युवा कारागार चलान भएका छन् । गत चैत्र–१६ गते अहेव कबिता दाहाललाई जिल्ला अस्पतालको आकस्मिक कार्यकक्षमा खुकुरी प्रहार गर्ने खाल्ले–८ का २२ वर्षीय अशोक केसीलाई पुर्पक्षकालागि कारागार चलान गरिएको हो ।
जिल्ला अदालत खोटाङको आदेशमा केसीलाई पुर्पक्षका लागि जिल्ला कारागार शाखा दिक्तेल चलान गरिएको जिल्ला प्रहरी कार्यालय खोटाङका प्रहरी नायव उपरीक्षक गोबिन्द साहले बताउनुभयो । अस्पतालको आकस्मिक कक्षमा काम गरिरहेको अवस्थामा अहेव दाहालमाथि खुकुरी प्रहार गर्ने केसी बिरुद्ध ज्यान मार्ने उद्योगको मुद्दा दर्ता भएको छ ।
दाहाललाई खुकुरी प्रहार गरेपछि भाग्दै गरेको अवस्थामा केसीलाई प्रहरीले पक्राउ गरेको थियो । खुकुरी प्रहारबाट टाउको, घाँटी र देब्रे हातमा गहिरो चोट लागेका दिक्तेल–९ सोल्माकी १९ वर्षीय अहेव दाहालको शिक्षण अस्पताल काठमाडौंमा उपचार भइरहेको छ ।
बेहोस अवस्थामा फिस्टेल एयरको हेलीकोप्टर मार्फत काठमाडौं पु¥याइएको दाहालको स्वास्थ्यमा क्रमिक सुधार आइरहेको आफन्तको भनाई छ । दाहाल ९ महिना अघिदेखि अस्थायी करार सेवामा अस्पतालमा काम गर्दै आएकी थिइन् ।
वर्ष दिन अघिदेखिको प्रेम सम्वन्धलाई दाहालले अस्वीकार गरेको आबेशमा केसीले खुकुरी प्रहार गरेको खुलेको प्रहरीले बताएको छ । विवाहका लागि गरिएको प्रस्तावलाई अस्वीकार गरेका कारण दाहालमाथि आक्रमण गरिएको अनुसन्धानबाट खुलेको प्रहरी नायव उपरीक्षक साहले बताउनुभयो । प्रहरीका अनुसार केसीले प्रेमीकाको हत्या गरेर आफै आत्महत्या गर्ने मनसायले खुकुरी प्रहार गरेको बयान दिएको छ ।
